А.Е. Арбузов исемендәге Органик һәм физик химия институтында Россия Фәннәр академиясе академигы, институтның фәнни җитәкчесе Олег Герольдович Синяшинның 70 еллыгына багышланган тантаналы җыелыш узды. Юбилярны Татарстан Рәисе Рөстәм Миңнеханов котлады.
Бүләкләү тантанасы «Элементоорганик кушылмалар химиясендә динамик процесслар» халыкара фәнни конференциясе кысаларында узды. Бу чара халыкара фәнни җәмәгатьчелектә киң танылу алган.
Татарстан Рәисе билгеләп үткәнчә, органик һәм физик химия институты – илнең иң эре күп профильле академик учреждениеләренең берсе. Киләсе елда аңа нигез салучы, Татарстанда туган Александр Арбузовның тууына 150 ел тулуны билгеләп үтү планлаштырыла.
«Институт үзенең бөтен тарихы чорында дөнья фәнни-техник прогрессының алдынгы чикләрендә булды һәм заманның иң катлаулы чакыруларына җавап бирү сәләтен күрсәтте. Бүген ул — куәтле фәнни-инновацион комплекс, ул заманның иң кырыс таләпләренә туры килә», – диде республика Рәисе.
Ул ассызыклаганча, озак еллар институтны Олег Синяшин җитәкләде, бүген ул аның фәнни җитәкчесе булып тора. «Аның укучыларының тулы бер төркеме Арбузов институтында һәм илнең башка алдынгы тикшеренү учреждениеләрендә күп санлы фәнни коллективларга идарә итә. 10 ел дәвамында Олег Герольдович Россия Фәннәр академиясенең Казан фәнни үзәге рәисе булды. Аның җитәкчелегендә үзәк Татарстанның фәнни-мәгариф комплексы эшенә органик рәвештә интеграцияләнде», — диде Рөстәм Миңнеханов.
Татарстан Рәисе билгеләп үткәнчә, нәкъ менә Олег Синяшин үз вакытында Казанда академик фәннең территориаль-аерымланган үзәген төзү инициативасы белән чыккан. Әлеге проект фән һәм технологияләр өлкәсендә Россия Президенты куйган илкүләм максатларга ирешүгә юнәлдерелгән һәм дәүләт башлыгы ярдәмен алган инде.
"Олег Герольдович, сез тагын бер тапкыр үзегезне стратегик фикер йөртүче, алдан күрүчән фән җитәкчесе итеп күрсәттегез. Сезнең шәхси абруегыз, эшлекле абруегыз, фәнни һәм административ казанышларыгыз илебез һәм халыкара фәнни җәмәгатьчелектә танылган. Илебез фәне һәм югары мәктәбе хакына яңа казанышлар, шулай ук нык сәламәтлек һәм иҗади озын гомер телим», — диде республика Рәисе.
Аннары Рөстәм Миңнеханов Олег Синяшинга илебез фәнен үстерүгә керткән зур өлеше һәм күпьеллык нәтиҗәле хезмәте өчен «Дуслык» ордены тапшырды.
Олег Синяшин үз чиратында республика җитәкчелегенә фәнгә ярдәм итүләре һәм галимнәр өчен шартлар тудырулары өчен рәхмәт белдерде, диелә ТР Рәисе Матбугат хезмәте хәбәрендә.
